अमेरिकी अध्यक्ष म्हणाले- तडजोड न झाल्यास आमच्याकडे पर्याय तयार: टेरिफ वाढीनंतर चीनची फोनाफोनी, 3 आठवड्यांत ट्रेड डील होणार- ट्रम्प

अमेरिकेचे राष्ट्राध्यक्ष डोनाल्ड ट्रम्प यांनी मोठा दावा करत सांगितले की, अमेरिकेने चीनी वस्तूंवर टेरिफ जवळपास तीन पट वाढवल्यानंतर चीनकडून सतत संपर्क साधला जात आहे. ट्रम्प यांच्या मते, पुढील तीन आठवड्यांत अमेरिका आणि चीन यांच्यात व्यापार करार होण्याची शक्यता आहे. ट्रम्प यांनी चीनी सी-फूडशी संबंधित नवीन कार्यकारी आदेशांवर स्वाक्षरी केल्यानंतर पत्रकारांशी संवाद साधला. त्यांनी सांगितले की, अमेरिकेने अलीकडेच चीनमधून आयात होणाऱ्या वस्तूंवर टेरिफ ५४% वरून १४५% पर्यंत वाढवले आहे, ज्यामुळे चीनचे वरिष्ठ अधिकारी सतत कॉल करत आहेत. ट्रम्प यांनी इशारा दिला की, चीनसोबत करार झाला नाही तरीही पर्याय आहे.

ट्रम्प यांना विचारले गेले की, त्यांनी चीनी राष्ट्राध्यक्ष शी जिनपिंग यांच्याशी थेट संवाद साधला आहे का, तेव्हा त्यांनी स्पष्ट उत्तर देण्यास नकार दिला. ट्रम्प पुढे म्हणाले, ‘जर करार झाला नाही, तरीही आम्ही आमच्या बाजाराचे नियम ठरवू.

रशिया-युक्रेनला अमेरिकेची धमकी, डील न झाल्यास वाटाघाटीतून बाहेर पडू

पॅरिसमधील बैठकीनंतर अमेरिकेचे परराष्ट्रमंत्री मार्को रूबियो म्हणाले, युक्रेन युद्ध समाप्त करण्याच्या दिशेने काही दिवसांत ठोस प्रगती झाली नाही, तर अमेरिका आपले प्रयत्न थांबवण्याचा विचार करेल. ‘जर हे शक्य नसेल, तर आम्हाला पुढे जावे लागेल.’ अमेरिकन प्रशासन रशिया आणि युक्रेन यांच्यात ३० दिवसांच्या युद्धबंदीच्या प्रयत्नात आहे. तथापि, रशियाने तत्काळ करारात रुची दाखवली नाही. तसेच, युक्रेननेही रशियन कब्जातील प्रदेश सोडण्यास व नाटोत सामील होण्याच्या इराद्यापासून मागे हटण्यास नकार दिला. पुढील बैठक लंडनमध्ये होणार आहे, जिथे परिस्थितीबाबत अंतिम निर्णय घेतला जाऊ शकतो.

ट्रम्पशी संघर्षानंतर हार्वर्डला वित्तीय मदत देण्यासाठी माजी विद्यार्थी पुढे सरसावले

अमेरिकेत ट्रम्प प्रशासन आणि हार्वर्ड विद्यापीठ यांच्यातील संघर्ष वाढत चालला आहे. ट्रम्प सरकारची मागणी न मानल्यामुळे विद्यापीठाची २.२ अब्ज डॉलरचे फंडिंग रोखले. मात्र विद्यापीठाच्या मदतीसाठी अनेक लोक पुढे येत आहेत. ट्रम्प सरकारच्या विरोधात माजी विद्यार्थी व नागरिकांनी हार्वर्डच्या समर्थनार्थ दान देणे सुरू केले आहे. सॅम्युअल ग्राहम-फेल्स यांनी यावेळी १०८ डॉलरची प्रतीकात्मक देणगी दिली. त्यांच्यानुसार, ट्रम्प जितका आर्थिक दबाव आणतील, तेवढेच ते दान करतील. माजी विद्यार्थ्यांचे मत आहे की, आता हा मुद्दा फक्त हार्वर्डचा नाही, तर शिक्षणाचे स्वातंत्र्य आणि लोकशाही मूल्यांचा आहे.

इटलीच्या पीएम मेलोनी-ट्रम्प भेट, युरोपीय लोक परजीवी वक्तव्यावरून माघार

पीएम मेलोनींनी व्हाइट हाऊसमध्ये ट्रम्पशी चर्चा केली. ईयूवर टेरिफनंतर ट्रम्पना भेटणाऱ्या त्या पहिल्या युरोपीय नेत्या आहेत. अमेरिकेचे राष्ट्राध्यक्ष ट्रम्प यांनी इटलीच्या पंतप्रधान जॉर्जिया मेलोनी यांची व्हाइट हाऊसमध्ये भेट घेतली. ही बैठक अमेरिकेने युरोपियन संघावर २०% टेरिफ लावल्यानंतर झाली. दोन्ही नेत्यांनी अमेरिका आणि युरोपियन संघ यांच्यातील संभाव्य टेरिफ डीलवर चर्चा केली. ट्रम्प म्हणाले की, युरोपियन संघासोबत ट्रेड डील १००% होईल, पण त्यांना याची घाई नाही. मेलोनी म्हणाल्या की, लवकरच डील फायनल होईल.

मुलाखतीदरम्यान एका रिपोर्टरने ट्रम्प यांना विचारले की, त्यांनी कधी युरोपियन लोकांना परजीवी म्हटले आहे का? मेलोनीने रिपोर्टरचा प्रश्न ट्रम्पसमोर पुन्हा विचारला. यावर ट्रम्प म्हणाले, ‘मी असे कधीच म्हटले नाही. यादरम्यान मेलोनी ट्रम्पच्या बचावासाठी पुढे आल्या त्यांनी तसे काही म्हटले नाही.