आमदारांच्या अपात्रतेचं प्रकरण लांबणीवर पडणार? शिवसेना आमदारांनी केली मोठी मागणी!

मुंबई, 25 जुलै, तुषार रूपनवार : आमदारांच्या अपात्रतेच्या निर्णयासंदर्भात मोठी बातमी समोर येत आहे. शिवसेना आमदार अपात्रतेचं प्रकरण लांबणीवर जाण्याची शक्यता आहे. शिवसेनेच्या 40 आमदारांकडून पुन्हा एकदा मुदतवाढ मागण्यात आली आहे. विधानसभा अध्यक्ष राहुल नार्वेकर यांच्याकडून शिवसेना आणि ठाकरे गटाच्या आमदारांना नोटीस पाठवण्यात आली होती. या नोटीसला उत्तर देण्यासाठी सात दिवसांचा कालावधी देण्यात आला होता, मात्र आता शिवसेनेच्या आमदारांनी पुन्हा एकदा मुदतवाढ मागितली आहे. मुदतवाढ मिळण्याची शक्यता  दरम्यान विधानसभेच्या अध्यक्षांनी पाठवलेल्या नोटीसला ज्या आमदारांनी उत्तर दिलं आहे, त्यांच्या उत्तराचा आढावा घेण्यासाठी विधीमंडळाची बैठक नुकतीच पार पडली. या बैठकीमध्ये या सर्व प्रकरणावर चर्चा झाली. मात्र अद्यापही 14 आमदारांच्या उत्तराचा आढावा घेणं बाकी आहे. त्यातच पावसाळी अधिवेशन सुरू असल्यामुळे शिवसेनेच्या आमदारांना मुदतवाढ मिळण्याची शक्यता आहे. त्यामुळे आमदारांच्या अपात्रतेसंदर्भातील हे प्रकरण लांबणीवर पडण्याची शक्यता आहे. काय आहे प्रकरण?  राज्याच्या सत्तासंघर्षाच्या प्रकरणावर निकाल देताना आमदारांच्या अपात्रतेचा निर्णय हा विधानसभा अध्यक्षांनी घ्यावा असं सुप्रीम कोर्टानं म्हटलं आहे. सुप्रीम कोर्टाच्या निर्णयानुसार आता विधानसभेचे अध्यक्ष राहुल नार्वेकर यांनी शिवसेना आणि ठाकरे गटाच्या आमदारांना नोटीस पाठवली होती. या नोटीसीला उत्तर देण्यासाठी सात दिवसांचा कालावधी देण्यात आला होता. मात्र आता शिवसेनेच्या 40 आमदारांकडून मूदतवाढ देण्याची मागणी करण्यात आली आहे, त्यामुळे हे प्रकरण लांबणीवर पडण्याची शक्यता आहे.

मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.