नाल्यात पडलेलं ते बाळ सापडलं का? Viral होणाऱ्या त्या फोटोमागचं काय आहे सत्य

मुंबई : राज्यात मुसळधार पाऊस थैमान घातल आहे. अनेक गावांचा संपर्क तुटला आहे. मुंबईकरांचीही दाणादाण उडाली आहे. मुसळधार पावसामुळे बुधवारी मुंबईची लोकल सेवा काही काळासाठी ठप्प झाली होती. अंबरनाथ ते कल्याण सेवा बंद होती. त्यावेळी कल्याणच्या दिशेनं जाणाऱ्या ट्रेनमधून एक महिला आणि त्यांच्यासोबत एक व्यक्ती आपल्या चार महिन्यांच्या बाळाला घेऊन लोकलमधून खाली उतरत असताना दुर्घटना घडली. त्या व्यक्तीच्या हातून तोल जाऊन बाळ निसटलं आणि थेट नाल्यात पडलं. त्यानंतर महिलेनं आक्रोश केला. तिथे गोंधळाची स्थिती निर्माण झाली होती. त्यानंतर काही काळाने सोशल मीडियावर हे बाळ सुखरुप वाचल्याचे फोटो व्हायरल होऊ लागले. ही बातमी वाऱ्याच्या वेगानं पसरत गेली मात्र तो फोटो खरंच त्या घटनास्थळावरचा होता का याचं फॅक्ट चेक न्यूज 18 लोकमतने केलं आहे. सोशल मीडियावर व्हायरल होणारा तो फोटो घटनास्थळावरचा नाही. हा फोटो त्या घटनेनंतर असाच व्हायरल होत आहे. 13 तास उलटूनही त्या महिलेचं बाळ अद्याप सापडलेलं नाही. त्यामुळे या फोटोवर आणि त्यासोबत फिरणारे मेसेज हे खोटे आहेत. याबाबत अधिकृत निवेदन देखील जारी करण्यात आलं आहे.

निवेदनात काय म्हटलं आहे? ठाकुर्ली ते कल्याण दरम्यान अंबरनाथ लोकल पावसामुळे थांबली होती. या लोकमधून उतरून एक महिला व एक व्यक्ति सहा महिन्याच्या बाळाला घेऊन रेल्वे ट्रॅकच्या बाजूला असलेल्या नाल्यावरील अरुंद रस्त्यावरून चालले होते. त्या व्यक्तिच्या हातात असलेले बाळ निसटून नाल्यात पडले. नाल्यातील पाण्याचा प्रवाह खूप जोराचा असल्याने ते बाळ वाहून गेले. बाळाचा शोध घेण्यासाठी स्थानिक प्रशासनाने प्रयत्न सुरू केले. रात्री त्या ठिकाणी एनडीआरएफची टीम पोचली होती. मात्र अंधार असल्याने शोध कार्य पूर्ण होऊ शकले नाही. पाण्यात पडलेले बाळ अद्याप सापडू शकले नाही. यासंबंधात बाळ सापडल्याची चुकीची माहिती माध्यमांमध्ये प्रसारित होत आहे. ठाणे जिल्हा प्रशासनास मिळालेल्या माहितीनुसार अद्याप वाहून गेलेल्या बाळाचा तपास लागलेला नाही.

मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.